फैशन चैनल

ताऊ बोल्या
ताई तै लगवा कै केबल
बिछा खटोल्ला चल देक्खेंगें फैशन चैनल
ताई बोल्ली-कुछ तो ढंग की बात करया कर
बहू-बेटियां भी सैं घर म्हं किमे डरया कर
ताऊ बोल्या-मान ले मेरी
चिन्ता कर काफूर
अर्र बहूबेटियां का तो नास करणा लागरी
एकता कपूर
एक लुगाई आठ खसम अर् यार अठारां
घपलेबाजी करता घूम्मैं कुणबा सारा
मेरी चाद्दर खाट सै तेरी जूत किसे का
बहू किसी की पूत किसे का खसम किसे का
बहू बेटियां नै यू घपला
जिब लाग्गै सै धौला
फेर बता फैशन चैनल मैं के सै रोला
---योगेन्द्र मौदगिल

सोद्दा

पढ़ कर कै अखबार
म्हारे ताऊ तै बोल्ली ताई
किसा कलजुग आग्या
एक आदमी नै
सैकल के बदले बेच दी
अपणी लुगाई
सुण कै ताऊ बोल्या
वाकई कलजुग आग्या
मैं तो
इसे आदमियां के सर पै जूत धरूं
अर्र मेरे धौरे
इसा सोद्दा आजै नी
मैं तो मोटरसैकल तै घाट
बात ना करूं
--योगेन्द्र मौदगिल